นิคฺโรธสามเณร ทสฺสน
[36]
ปิตา สฏฺฐิสหสฺสานิ, พฺราหฺมเณ พฺรหฺมปกฺขิเก;
โภเชสิ โสปิ เตเยว, ตีณิ วสฺสานิ โภชยิฯ
[37]
ทิสฺวา’นุปสมํ เตสํ, อโสโก ปริเวสเน;
วิเจยฺย ทานํ ทสฺสนฺติ, อมจฺเจ สนฺนิโยชิยฯ
[38]
อาณาปยิตฺวา มติมา, นานาปาสณฺฑิเก วิสุํ;
วีมํสิตฺวา นิสชฺชาย, โภชาเปตฺวา วิสชฺชยิฯ
[39]
กาเล วาตายนคโต, สนฺตํ รจฺฉาคตํ ยติํ;
นิคฺโรธสามเณรํ โส, ทิสฺวา จิตฺตํ ปสาทยิฯ
[40]
พินฺทุสารสฺส ปุตฺตานํ, สพฺเพสํ เชฏฺฐภาตุโน;
สุมนสฺส กุมารสฺส, ปุตฺโต โส หิ กุมารโกฯ
[41]
อโสโก ปิตรา ทินฺนํ, รชฺชมุชฺเชนิยญฺหิ โส;
หิตฺวา’คโต ปุปฺผปุรํ, พินฺทุสาเร คิลานเกฯ
[42]
กตฺวา ปุรํ สกายตฺตํ, มเต ปิตริ ภาตรํ;
ฆาเตตฺวา เชฏฺฐกํ รชฺชํ, อคฺคเหสิ ปุเร วเรฯ
[43]
สุมนสฺส กุมารสฺส, เทวี ตนฺนามิกา ตโต;
คพฺภินี นิกฺขมิตฺวาน, ปาจินทฺวารโต พหิฯ
[44]
จณฺฑาลคาม มคมา, ตตฺถ นิคฺโรธเทวตา;
ตมาลปิยนาเมน, มา ปตฺวา ฆรกํ อทาฯ
[45]
ตทเห’ว วรํ ปุตฺตํ, วิชายิตฺวา สุตสฺส สา;
นิคฺโรโธติ อกา นามํ, เทวตา นุคฺคหานุคาฯ
[46]
ทิสฺวา ตํ เชฏฺฐจณฺฑาโล, อตฺตโน สามินิํ วิย;
มญฺญนฺโต ตํ อุปฏฺฐาสิ, สตฺตวสฺสานิ สาธุกํฯ
[47]
ตํ มหาวรุโณ เถโร, ตทา ทิสฺวา กุมารกํ;
อุปนิสฺสย สมฺปนฺนํ, อรหา ปุจฺฉิ มาตรํฯ
[48]
ปพฺพาเชสิ ขุรคฺเค โส, อรหตฺตมปาปุณิ;
ทสฺสนาโย’ป คจฺฉนฺโต, โส ตโต มาตุเทวิยาฯ
[49]
ทกฺขิเณน จ ทฺวาเรน, ปวิสิตฺวา ปุรุตฺตมํ;
ตํ คามคามิมคฺเคน, ยาติ ราชงฺคเณ ตทาฯ
[50]
สนฺตาย อิริยา ยสฺมิํ, ปสีทิ สมหีปติ;
ปุพฺเพ’ว สนฺนิวาเสน, เปมํ ตสฺมิํ อชายถฯ
[51]
ปุพฺเพ กิร ตโย อาสุํ, ภาตโร มธุ วาณิชา;
เอโก มธุํ วิกฺกิณาติ, อาหรนฺติ มธุํ ทุเวฯ
[52]
เอโก ปจฺเจกสมฺพุทฺโธ, วณโรคาตุโร อหุ;
อญฺโญ ปจฺเจกสมฺพุทฺโธ, ตทตฺถํ มธุวตฺถิโกฯ
[53]
ปิณฺฑจาริกวตฺเตน, นครํ ปาวิสี ตทา;
ติตฺถํ ชลตฺถํ คจฺฉนฺติ, เอกา เจฏี ตมทฺทสฯ
[54]
ปุจฺฉิตฺวา มธุกามตฺตํ, ญตฺวา หตฺเถน อาทิสิ;
เอโส มธฺวาปโณ ภนฺเต, ตตฺถ คจฺฉา’ติ อพฺรวิฯ
[55]
ตตฺถ ปตฺตสฺส พุทฺธสฺส, วาณิโช โส ปสาทวา;
วิสฺสนฺทยนฺโต มุขโต, ปตฺตปุรํ มธุํ อทาฯ
[56]
ปุณฺณญฺจ อุปฺปตนฺตญฺจ, ปติตญฺจ มหีตเล;
ทิสฺวา มธุํ ปสนฺโน โส, เอวํ ปณิทหี ตทาฯ
[57]
ชมฺพุทีเป เอกรชฺชํ, ทาเนนา’เนน โหตุ เม;
อากาเส โยชเน อาณา, ภูมิยํ โยชเนติ จฯ
[58]
ภาตเร อาคเต อาห, เอทิสสฺส มธุํ อทํ;
อนุโมทถ ตุมฺเห ตํ, ตุมฺหากญฺจ ยโต มธุฯ
[59]
เชฏฺโฐ อาห อตุฏฺโฐ โส,
จณฺฑาโล นูน โสสิยํ;
นิวาเสนฺตีติ จณฺฑาลา,
กาสายานิ สทา อิติฯ
[60]
มชฺโฌ ปจฺเจกพุทฺธํ ตํ, ขิปปารณฺณเว อิติ;
ปตฺติทานวโจ ตสฺส, สุตฺวา เต จานุโมทิสุํฯ
[61]
อาปณา เทสิกํ ยาตุ, เทวิตฺตํ ตสฺส ปตฺถยิ;
อาทิสฺสมานสนฺธิ จ, รูปํ อติมโนรมํฯ
[62]
อโสโก มธุโท’สนฺธิ-มิตฺตาเทวี ตุ เจฏิกา;
จณฺฑาลวาที นิคฺโรโธ, ติสฺโส โส ปารวาทิโกฯ
[63]
จณฺฑาลวาที จณฺฑาล-คาเม อาสิ ยโต ตุ โส;
ปตฺเถสิ โมกฺขํ โมกฺขญฺจ, สตฺต วสฺโสว ปาปุณิฯ
[64]
นิวิฏฺฐเปโม ตสฺมิํ โส, ราชา’ติ ตุริโต ตโต;
ปกฺโกสาเปสิ ตํ โส ตุ, สนฺตวุตฺตี อุปาคมิฯ
[65]
นิสิท ตาตา’นุรูเป, อาสเน ตา’ห ภูปติ;
อทิสฺวา ภิกฺขุมญฺญํ โส, สีหาสนมุปาคมิฯ
[66]
ตสฺมิํ ปลฺลงฺกมายาเต, ราชาอิติ วิจินฺตยิ;
อชฺชา’ยํ สามเณโร เม, ฆเร เหสฺสติ สามิโกฯ
[67]
อาลมฺพิตฺวา กรํ รญฺโญ, โส ปลฺลงฺเก สมารุหิ;
นิสีทิ ราชปลฺลงฺเก, เสตจฺฉตฺตสฺส เหฏฺฐโตฯ
[68]
ทิสฺวา ตถา นิสินฺนํ ตํ, อโสโก โส มหีปติ;
สมฺภาเวตฺวาน คุณโต, ตุฏฺโฐ’ตีว ตทา อหุฯ
[69]
อตฺตโน ปฏิยตฺเตน, ขชฺชโภชฺเชน ตปฺปิย;
สมฺพุทฺธเทสิตํ ธมฺมํ, สามเณรมปุจฺฉิตํฯ
[70]
ตสฺส’ปฺปมาทวคฺคํ โส, สามเณโร อภาสถ;
ตํ สุตฺวา ภูมิปาโล โส, ปสนฺโน ชินสาสเนฯ
[71]
อฏฺฐ เต นิจฺจภตฺตานิ, ทมฺมิ ตาตา’ติ อาห ตํ;
อุปชฺฌายสฺส เม ราช, ตานิ ทมฺมีติ อาห โสฯ
[72]
ปุน อฏฺฐสุ ทินฺเนสุ, ตาน’ทา จริยสฺส โส;
ปุน อฏฺฐสุ ทินฺเนสุ, ภิกฺขุสงฺฆสฺส ตาน’ทาฯ
[73]
ปุน อฏฺฐสุ ทินฺเนสุ, อธิวาเสสิ พุทฺธิมา;
ทฺวตฺติํสภิกฺขู อาทาย, ทุติยทิวเส คโตฯ
[74]
สหตฺถา ตปฺปิโต รญฺญา, ธมฺมํ เทสิย ภูปติํ;
สรเณสุ จ สีเลสุ, ฐเปสิ สมหาชนํฯ
นิคฺโรธสามเณรทสฺสนํ
สาสนปฺปเวส
[75]
ตโต ราชา ปสนฺโน โส, ทิคุเณน ทิเน ทิเน;
ภิกฺขู สฏฺฐิสหสฺสานิ, อนุปุพฺเพนุ’ปฐหิฯ
[76]
ตตฺถิยานํ สหสฺสานิ, นิกฑฺฒิตฺวาน สฏฺฐิโส;
สฏฺฐิภิกฺขุสหสฺสานิ, ฆเร นิจฺจมโภชยิฯ
[77]